ഇന്ന് ലോക വന്യജീവി ദിനം...
ഏതെങ്കിലും ഒരു കാട്ടില് രാജാവായി വാഴേണ്ട എന്നെ നിങ്ങള് ഈ കാരാഗൃഹത്തിലടച്ചു. നിങ്ങളുടെയും നിങ്ങളുടെ കുട്ടികളുടെയും പരിഹാസത്തിനും കൂക്കി വിളികള്ക്കും പാത്രമായി ഇവിടെ കഴിയുന്ന എന്റെ ഈ മുഖത്തേക്കൊന്നു സൂക്ഷിച്ചു നോക്കൂ... ഞാനും നിങ്ങളെപ്പോലെ ജീവനും അഭിമാനവും വികാരങ്ങളും വിചാരങ്ങളുമുള്ള ഒരു ജീവി അല്ലെ? രാജകീയ പ്രൌഡി ഉണ്ടായിരുന്ന ഈ കണ്ണുകളില് ഇന്നുള്ളത് വെറും ദൈന്യത മാത്രം. എന്റെ മുന്നിലുള്ള ഇരുളടഞ്ഞ ഭാവി നിങ്ങള് കാണുന്നില്ലേ? ഈ കാരാഗൃഹത്തില് തന്നെയല്ലേ എന്റെ അന്ത്യവും.? എന്തുകൊണ്ടാണ് നിങ്ങള് മനുഷ്യര് മാത്രം ഇങ്ങനെ ക്രൂരന്മാരായി പോകുന്നത്? ഞങ്ങള് മൃഗങ്ങള് ഒരിക്കലും നെറികേട് കാണിക്കില്ല. വിശ്വാസവഞ്ചന കാണിക്കില്ല. എന്നിട്ടും ഞങ്ങള്ക്കീ ശിക്ഷ നല്കാന് നിങ്ങള്ക്കല്ലാതെ മറ്റാര്ക്കുമാവില്ല. എന്നാണ് ഇതിനൊക്കെ ഒരു അവസാനം ഉണ്ടാവുന്നത്?
മനുഷ്യാവകാശങ്ങള്ക്ക് വേണ്ടി മുറവിളി കൂട്ടുന്ന മനുഷ്യ കൂട്ടങ്ങളെ, നിങ്ങള് കാണുന്നില്ലേ ഈ കൊടും ക്രൂരത. ഞങ്ങളുടെയൊക്കെ അവകാശങ്ങള് ധ്വംസിച്ചു നിനക്കും നിന്റെ കുട്ടികള്ക്കും രസിക്കണം അല്ലെ... ദൈവം പോലും പൊറുക്കില്ല നിന്നോട്... നിന്റെ ഈ ക്രൂരതകള് അവസാനിപ്പിച്ചില്ലെങ്കില് നിനക്ക് കാണേണ്ടി വരും മനുഷ്യാ, നിന്റെ സമൂഹത്തിന്റെ അന്ത്യവും... സ്വന്തം ചെയ്തികള് കൊണ്ട് തന്നെ... സുന്ദരമായ ഈ ഭൂമിയും നിങ്ങള് നശിപ്പിക്കും... കണ്ണുകള് തുറക്കൂ മനുഷ്യാ... കണ്ണുകള് തുറക്കൂ...
